Una bellissima poesia in dialetto calabrese ci sta proprio a puntino:

Asprumunti

Non 'ndavi 'cchiu restuccia a la campagna,

mò ch'agustu disvampa alla marina!

O pecuraru, re di la muntagna,

lassa lu chianu e pigghia la pindina.

'Nta la bertula menti pochi pani;

cunta e ricunta pecuri e muntuni;

'rringa la mandra, avanti cu li cani,

arretu vanci tu cu lu vastuni!

E… camina, camina, pecuraru,

sata li timpi e passa li sciumari.

Cu sapi quantu tempu t'aspittaru

li cosi chi 'ddassasti a li pagghiari.

Non ti firmari! Seguita la strata

finu chi non 'rrivi a lu strapuntu

d'undi lu munti, arretu a la vutata

isa la testa e scumbogghia la frunti.

Vicinu a 'ttia la troffa di zappini,

a lu sirinu li capiddi sfrundi

e poi luntanu, chi non pari fini,

lu celu cu lu mari si cunfundi.

Persu 'nta ll'aria all'occhi toi davanti

Asprumunti ti varda e resta mutu.

Pari nu vecchiu, pari nu giganti,

pari nu santu! Facci nu salutu.

Dinci: ora e sempri biniritta sia

l'ura chi mi cunsola e m'accumpagna;

Santu Asprumunti, si luntanu ia,

surda era l'aria e la terra sulagna.

Ma ora chi ti viu e la to vuci

mi porta li carizzi di lu ventu

fazzu lu signu di la santa cruci

e all'umbra tua mi curcu e m'addurmentu.

E…. dormi, dormi! ca lu sonnu veni,

dopu vintiquattruri di caminu,

e non ci faci nenti si non teni

nu mataruzzu musciu e nu cuscinu;

quandu 'nci su li fogghi di la serra

e 'nta li fossi non luci lu ielu,

non 'ndavi lettu megghiu di la terra.

non c'è suffittu megghiu di lu celu.

(Napoleone Vitale)